اي قهرمان آذربايجان ميللتي سن تاريخ بويو شرفله ياشاميسان . غئيرتله ياشاميسان . غرورلا ياشاميسان ، ۷۵۰۰ ايلليك تاريخينده آلچاقليغا- عداليسيزلي يه باش ايمه ميسن.. آزادليق اوچون ساواشميسان . باشقا ميللتلره احترام گوزو ايله باخماميسان . كيمسه ني تحقير ائتمه ميسن . اليوين آلتيندا ياشايان ميللتلره حورمتله ياناشميسان . اونلارين وارليقلاريني ، ديللريني ، عنعنه لريني يوخ ائتمه ميسن . عكسينه گوز به به يي كيمي قوروموسان ....!  اي آلني آچيق شرفلي ميللتيميز ۱۷۵ ايلدن به ري سنين وارليغيوي گوزو گوتورمه ين فارس - روس شوونيست مستملكه چي لري و اونلارين اويونجاغي اولان ائرمني جانيلري وطنيوي تيكه - پارچا ائده ره ك اوز ايچينده اريتمه ، يعني فارسلاشديرماغا - روسلاشديرماغا چاليشميش و چاليشماقدايدرلار. چوخلو قوربانلار وئرديكده ن سونرا وطنين اوتايي مستقيل اولسادا روسلار و اونلارين اويونجاغي اولان ائرمني جانيلري - داشناكلاري بير چيبان كيمي اوه ييميزين باشيندا چيخارداراق ، آنا وطنيميزين مقدس توپراقلاريندا اونلارا » قوندارما ائرمنيستان « ياراتماقلا قالماييب ، تيكرار وطنين بويوك بير حيصه سيني ايشغال ائتمكده اونلارا يارديمجي اولموشدور. روسلار هنوز گئچميش مستملكه لريندن گوز يومماميشلار. بو حركتلري ايله قوزئي آذربايجاني ضعيف دوشورمك ايسته ييرلر. شوونيست مستملكه چي تئهران رئڑيمي ده روسلارلارين و ائرمني جانيلريني يانيندا يئرآالماقداديرلار.  گونئي آذربايجانا گلديكده بورانين وضعيتي هاميميزا معلومدور. تئهران رئڑيمي مستملگه چي لي يين ان چيركين شكليني گونئي آذربايجاندا تطبيق اتمكده دير. وطنيميزين بوتوولويونو و طبيعي سرحدلريني نئجه دييه رلر » استان «لارا بولمكله داغيتميشدير. وطنيميز بير خرابايا چئوريلميشدير. خالقيميزا اهانت لر ائتمكله ميللتيميزي روحي » پيسيكولوڑيك « بوحرانا دوچار ائتمك ايسته ييرلر. وارليغيميزي ، ديليميزي ، كولتوروموزو ، وار يوخوموزو داغيتماق ، تالاماق ، يوخ ائتمك سياستي آپاريرلار. تاريخ بويو غرورلا ياشايان ميللتيميز تحقير ائديليب ، دوغما ديلينده ن بئله محروم ائديلميشدير. بورادا بونو قئيد ائتمك ايسته رديك كي ، بير ميللت هر بير شئييني ايتيره بيله ر. آمما ديليني الده ن وئرديكده داها ميللت اولدوغونو الده ن وئره ر ، تاريخده ن سيلينه ر، يوخ اولار - گئده ر. ميللتيميزين دوشمني ساييلان فارس شوونيستلري نين ائله هدفي ده بودور. آمما بونا ميللتيميز ايجازه وئرميه جكدير.  آي آغير سيناقلاردان باشي اوجا چيخان ميللتيميز بوگون تيكرار او سيناق گونلريندن ساييلير. تاريخين ان قارانلق ، ان دئهشتلي ، ان آجي گونلريني ياشاماقداسان . اسارتين ان چيركين شكلينه دوچار اولموسان .الين - قولون فارس شوونيزمي نين اسارت زنجيرنده دير. بو قارانليغي آيدينليغا چئويرمه ليسن ، خوشبخت ياشاماليسان ، اسارت زنجيريني قيريب ، آزاد - مستقيل ياشاماليسان ، سيز عزيز ميللتيميز بونا لاييق بير ميللت سينيز. بوگون ميللتيميزين قهرمان و فدكار اوغلو بابك ين دوغوم گونو مناسيبتيله بورايا ييغيشماميز بو لياقته بير دليلدير. بابك ين حضورونا گليب ، اونون ۲۲ ايل عرب ايستيلاچيلارينا قارشي قهرمانجا وطنين آزادليغيني - مستقيللي ييني ، شرف و ناموسونو قوروماق اوچون ساواشديغي بو يئره توپلانماميز اونون گئتديي يولو سئچمه ميزي گوسترير. عين زاماندا بو اولو بابك ميزله بيرليكده ايستيلاجيلارا ، مستملكه چيلره ، يادلارا قارشي ساواشان آتا- بابالاريميزين گئتدييي يولا صاديق قالماقدير. بورا ييغيشماميز بابكيميزله آتا- بابالاريميزلا ايلقار ، عهد - پئيمان باغلاماق دئمكدير. يعني اونلار كيمي قورخمادان قدار دوشمنه قارشي ، بوگونكو ايشغالچيلارا قارشي ساواشاجاغيميزي ، بويولدا جانيميزي ، ماليميزي هر شئييميزي وئرمه يه حاضير اولدوغوموزو اعلان ائتمك دئمكدير.  اي شرفلي - غئيره تلي ميللتيميز بو ايل بابك ين دوغوم گونو چوخ حساس بير شراييطده گئچيريلمكده دير. آمئريكا دولتي واختي ايله شاهي حاكمييته گتيريب ، و ايشينه ياراماديقدا اونو آپاريب ، يئرينه منفور تئروريست خميني رئڑيميني گتيردييي كيمي ، بو دفعه ده بو رئڑيمي حاكميت دن اوزلقلاشديرماق ايسته يير.  آمما تئهراندا رئڑيم ده ييشمك بيزيم مسئله ميز دئييلدير. بيز ايران دئييله ن يئرين ، اونون بوتونلويونون داواسيني آپارميريق. بيزيم داواميز يالنيز و يالنيز آذرباجان داواسيدير. ايسته ر مشروطيت دوورونده ، ايسته رسه ده شاهين آپاريلماسيندا كي سهولره يول وئرمه مه لي ييك . احساساتا قاتيلمامالي ييق . هيجان و حيس لريميزي آياق آلتينا قوياراق مسئله يه تكجه آذربايجان منافعي آچي سيندان باخمالي ييق و ياناشمالي ييق . دوزدور بو منفور تئروريست و شوونيست رئڑيمين تئهراندا حاكمييت دن اوزاقلاشديريلماسي سئوينديريجي بير حاديثه اولا بيله ر. آمما دويقوساليغا - احساساتا يول وئريلمه مه ليدير. بونو كسين ليكله بيلمك لازيمديركي ، بو رئڑيم يئرينه گتيريله جك هرهانسي فوقول - كيراواتلي رئڑيمده آذربايجان ميللتي نين آزادليغينا - مستقيللي يينه ايجازه وئرميه جكدير. تيكرار خوش سوزلره ، وعده - وعيدلره آلدانيرساق هر شئيي الدن وئره جي ييك . تاريخ بيزي لعنت له ياد ائده جكدير.  اي آزادليق سئوه ر ميللتيميز بيز واحيد مستقيل آذربايجان جبهه سي اولاراق ميللي قورتولوش ساواشي آپاريريق . بيز آذربايجانين ميللي تشكيلاتلاريندان بيري اولاراق ايراني نجات وئرمك اوچون يارانماميشيق . واحيد مستقيل آذربايجان جبهه سي نين يارديلماسيندان مقصد گونئي آذرباجانين مستقللي يي ، باغلي سيزليفي ، ميللتيميزين آزادليغي مقدراتيني اوز الينه آلماسيدير. بيز دئموكراسييا ، سئكولئر دولچي لييه ، يعني دين نين سياسته قاريشماماسينا ، قانون اوستونلويو اولان بير آذربايجان توپلومو اوچون موجاديله وئريريك .هدف اوزون وعده لي اولاراق ايكي آذربايجانين بيرلشمه سيدير. بئله بير دورومدا آمئريكانين پروگرامي نه اولورسا - اولسون بيزيم يولوموز قورتولوش ساواشيدير.  واحيد مستقيل آذربايجان جبهه سي نين پروگراميندا يئر آلديغي كيمي بيز بوتون دولتلرله برابر حقوقلو موناسيبتلردن ياناييق . بونا گوره ده آمئريكا دوولتي ايله دوشمن دئييليك . دوشمن اولماديغيميز كيمي ، اونون قوللوقچوسودا دئييليك . موناسيبتلريميز آذربايجان ميللي منافعي چرچيوه سينده اولاجاقدير... واحيد مستقيل آذربايجان جبهه سي اولاراق حقيقي آذربايجانچيلارا ، ميللتچيلره ايختار وئريب ، اويارماق ايسته ييريك . تئهران رئڑيمي و اونون يئرينه گلمه يه حاضيرلاشان وارداتي شخصلر و حتا بعضي آمئريكان داييره لري ايران دئييله ن يئرده نئجه دييه رلر فئدراتيو شعاري اورتايا آتيرلار. اونلارين فئدراتيودن آنلاديقلاري شئي تام يوخ ، نسبي اولاراق ديل آزادليغي و تئهرانين قوللوقچوسو اولان شخصيلري والي كيمي سئچمكدن باشقا بير شئي دئييلدير. اونلارين اورتايا آتديقلاري فئدراتيو مستقيل دوولتلر بيرلي يي دئييلدير. ميللتلر اوز طالعلريني ايسته ديكلري كيمي تعيين ادتمك حاقلاري يوخدور. اونلارين دئديكلري فئدراتيو ايراندا آذربايجانين تماما مستقيل حوكومتي ، مستقيل مجليسي ، مستقيل ايقتصاديياتي، مستقيل اوردوسو، مستقيل داخيلي- خاريجي سياستي يوخدور . آچيقجا دئسك اونلار اوز مستعمره لريني بو آد آلتيندا قوروماق ايسته ييرلر. ايران دئييله ن يئرده آذربايجان ميللتي كيمي اسير اولان باشقا ميللتلريده اوز مستملكه لرينده ساخلاماغا ، ميللتلري آلداتماغا چاليشيرلار. اي موباريز قهرمان ، ايگيت ميللتيميز واحيد مستقيل آذربايجان جبهه سي نين يولو معلومدور. واحيد مستقيل آذربايجان جبهه سي دوشمنين بو مرحله اي تاكتيك لرينه و كله كلرينه اويماياجاقدير. واحيد مستقيل آذربايجان جبهه سي تام مستقيل ، آزاد ، باغلي اولمايان ، سئكولئر دئموكراتيك حقوق دولتي نين آذربايجاندا يارانماسي اوچون موجاديله وئرير. نهايي هدفي ايسه فارس - روس مستملكه چيلري نين الي ايله پارچالانميش وطني بيرلشديرمكدير. اوزگه لري وطنيميزدن قووماقدير. واحيد بو هدفلر اوغروندا ساواشميش و يئنه ده ساواشاجاقدير. بو يول اولو بابك ين گئتدييي يولدور. بو يولدا گئده نلره ، وطنين آزادليق و مستقيللي يي اوجون ساواشانلارا عشق اولسون ! واحيد مستقيل آذربايجان جبهه سي عالي شوراسي  تبريز ۲۵ خرداد۱۳۸۲ )۱۵ ڑوئن۲۰۰۳