بیر میللت، بیر وطن، بیر بایـــــراق ! سون آیلاردا جبهه نین عنوانینا گله ن مکتوبلارین ایچینده وئریله ن سواللاردان بیریده آذربایجانین میللی بایراغی حاقدا جبهه نین گوروشودور. واحید مستقیل آذربایجان جبهه سی نین فیکرینه گوره آذربایجان میللتی بیر میللت اولاراق هاردا یاشاماسیندان آسیلی اولمییاراق بیر بوتوندور. آیری- آیری آدلارلا گوسترمه یه چالیشانلار آذربایجان میللتی نین ـ تورکلری نین دوستو ساییلا بیلمه زلر. بیر میللت اولاراق بو بوتونلویو قوروماق، علاقه لری گوجلندیرمک، هر بیرآذربایجان وطنداشی نین وظیفه سیدیر. ائله جه ده آذربایجان تو‎پراقلاری و اراضیلری پارچالانمازدیر، باغیشلانمازدیر. تاریخی اولوشوملار)پروچئس لر( نتیجه سینده یادلار الی ایله پارچالانمیش وطنیمیزین تیکرار بوتوولویونه چالیشماق میللی بورجوموزدور. وطنی بولمک ، پارچالاماق، قوندارما آدلار قویماق ، بئله شئیلری قبول ائتمک اولماز. مستملکه چیلر اوز مستملکه چی سیاستلرینی اویقولاماق) تطبیق ائتمک(، بیزلری اوز ایچینده اردیب ) اسیمیله ائدیب( کیملی ییمیزی الیمیزدن آلماق اوچون بئله ایشلری گورورلر. آذربایجان آدلی وطنیمیزده میللتیمیز کیمی بیربوتوندور.اوزونو آذربایجانلی بیله ن هرکس اوچون بو وطنین توپراغی نین هر قاریشی مقدس دیر، بولونمه ز و ال وورولمازدیر. هر بیر میللتین وارلیغینی گوسته ره ن، اونو تمثیل ائده ن شئیلردن بیریده او میللتین میللی بایراغیدیر. هر بیر میللتین بیر وطنی، بیر کیملی یی اولدوغو کیمی، بیر دانادا میللی بایراغی اولمالیدیر.آذربایجان یادلار الی ایله ایکی اساس حیصه یه بولوندوکدن سونرا هر مستملکه چی اوز بایراغینی بیزه تحمیل ائتمه یه چالیشمیشدیر. لاکین قوزئی آذربایجان ۱۹۱۸ ـ ده مستقیللی یینی الده ائدیب، دئموکراتیک آذربایجان جیمهورییتی نی قوردوقدان سونرا، آذربایجانین میللی بایراغینی یاراتمیش ، آذربایجان پارلئمنتوسو ومیللتی قبول ائتدیکدن سونرا دونیا ایجتماعیتینه تقدیم ائدیلمیشدیر ۷۰ - ایل سوویئت حاکمیتیندن سونرا تیکرار هامان بایراق مستقیل قوزئی آذربایجانین بایراغی اولموش و بین الخالق ایجتماعیت طرفیندنده آذربایجان بایراغی اولاراق منیمسه نمیشدیر. گونئی آذربایجان هنوز فارس شوونیزمی نین مستملکه سینده اولدوغوندان، بو حاقدا گوروشونو) نظرینی( بیلدیره بیلمه سه ده ، میللتیمیزین ، و دوغما وطنیمیز آذربایجانین ، اوزون وعده لی میللی منافعینی نظره آلاراق، بیرلیک سمبولو کیمی، بو بایراغی اوز میللی بایراغی کیمی قبول ائتمیشدیر. واحد مستقیل آذربایجان جبهه سیده بو آچیدان حرکت ائده ره ک، اوز مرامنامه سینده بو حاقدا بئله یازیر: » گونئی آذربایجان اوز مستقیللی یینی الده ائدیب، اوز میللی حوکومتینی یارادیب، ائل اوجاغینی ) پارلئمئنتوسونو ( قوروب ، ایکی آذربایجانین بیرلشمه سی اوچون، هر ایکی آذربایجان دولتی نین پارلئمئنت، و حقوقچولاری نین ایشتیراکی ایله، آنایاسا ، بایراق ، بیرلشمه قایدالاری، و باشقا ساحه لر اله آلیناجاقدیر. بو قرارلار آلینانا قده ر، بیرلیک سمبولو اولاراق، قوزئی آذربایجانین بایراغی گونئی آذربایجان دولتی نین بایراغی ساییلیر. واحید مستقیل آذربایجان جبهه سی قانونا دایانان دئموکراتیک حقوق دولتی اوصولونا اینادیغیندان ، هر ایکی پارلئمنتو و متخصیصلر طرفیندن آلینان قرارلاری آذربایجان میللتی نین ایختیاریندا قویولاجاقدیر. آذربایجان میللتیده عموم خالق سورغوسو ) رئفراندوم( واسیطه سیله اوز گوروشونو بیلدیره جکدیر. واحید مستقیل آذربایجان جبهه سی نین بوگونلوک تانیدیغی بایراق دونیا ایجتماعیتی طرفیندن تانینمیش اوچ رنگیلی بایراقدیر . بو بیزم بیرلیک سمبولو اولماقلا یاناشی میللی بایراغیمیزدیر.« گونئی آذربایجانداکی سیاسی تشکیلاتلارا گلدیکده، هر تشکیلات ، هر فیرقه اوزونه تشکیلات بایراغی ، فیرقه بایراغی یارادا بیله ر. نئجه ده کی، واحید مستقیل جبهه سی نین تشکیلات بایراغی آبی قوماش اوستونده جبهه نین آرمی )گئرمی( یعنی ال ایچینده اود، آذربایجانین ۹ - ایالتینی تمثیل ائده ن اولدوزلاردان عبارتدیر. آمما قئید ائتدییمیز کیمی، بو گونئی آذربایجانین یوخ، واحید مستقیل آذربایجان جبهه سی نین تشکیلات بایراغیدیر. هئچ بیر سیاسی تشکیلات اوز باشینالیقلا گونئی آذربایجان اوچون قوندارما بایراق یارادا بیلمه ز. بونا حاقی و صلاحیتی یوخدور. بو مسئولیت سیزلیک دیر. دئموکراسی آنلاییشینا ضیددیر. آذربایجان میللتینه حورمت سیزلیکدیر. هر شئیدن موهومو آذربایجانین بوتوولویونو پوزماق دئمکدیر. بیله ره ک یاخود بیلمییه ره ک مستملکه چی تئهران رئڑیمینه خدمت دئمکدیر.